سألناكم امبارح عن معني كلمه " المصنعية "

ياترى ايه هى المصنعيه : 

ببساطه شديده .. اى قطعه ذهب بنشوفها بالشكل الحالى بتمر بعده مراحل 

هنحكيلكم الحكايه وهنحاول نختصر بقدر الإمكان لان الموضوع كبير جداً ومرهق جداً جداً والمجهود المبذول فى الموضوع ده فعلاً ضخم 

اول حاجه هنبدأ بيها هى مرحله تجميع #الذهب القديم اللى بيتجمع من المحلات بعد ما حضرتك تبيعه للصائغ 

الذهب ده بيتجمع وبيروح لمحلات اسمها "المسوؤجيه" اللى بتشترى من محلات القطاعى و اللى بتسلم الذهب ده  للمصانع او الورش اما فى صوره كسر وده قليل جداً او فى صوره سبائك بلدى او ذهب بندقى واللى بيتصرف عليه حوالى 6ج علشان يتحول للسبائك علشان المصانع تقبله ودى اول فلوس بتتحمل على سعر الجرام "المصنعيه"

المصانع او الورش بتستلم الذهب ده وبتصهره وتظبط العيار بتاعه حسب تخصص شغلها سواء 21 او 18 او غيره

بعدين تبدأ مراحل تصنيع مختلفه منها اليدوى البحت ومنها اللى بيحتاج ماكينات 

المرحله دى فيها شغل كتير جداً وماكينات بتشكل الشغل وبعدين تقطعه 

بعدها بييجى دور الصنايعى الفنان اللى بيجمع الشغل ده وبيركب القطع وبيلحم ويرم ويظبط وبعدين يشطب الشغل سواء بتلميع او نقش او عمل الالوان والستانيه وخلافه

كل ده لازم الورشه او المصنع ياخد عليه مقابل المقابل ده اسمه #المصنعيه 

بعدين بيتم تسليم الشغل لمحلات الجمله اللى لازم تضيف هامش ربح على المصنعيه دى 

كمان فى بعض الأحيان بيتسلم الشغل للأبونيه اللى بيضيف هو كمان هامش ربحه 

بعدين بيتم تسليم الشغل لمحلات القطاعى اللى بردو لازم تضيف هامش ربحها

بعدين يوصل لحضرتك الشغل فى الفاترينه تتفرج وتختار 

وانت قاعد زى الباشا

والف الف مبروووووك